Lehen Hezkuntzako bigarren mailako ikasle-irakasleak burututako ekintza
garrantzitsua jakinarazi nahi dizuegu. Curriculumaren barruan dagoen
birziklapenaren gaia jorratu dute. Ikastolako Sakramentinoetako eraikina
hondakinen sailkapenerako azpiegiturarik gabe zegoela ohartu ziren.
Errealitatea ikusita, inguruko udalei kaleko zakarrontzi zaharrak eskatzea
pentsatu zuten; Tolosako udalari gutuna idatzi zioten denon artean. Jasotako
zakarrontzi zaharrak garbitu, pintatu eta jolaslekuan jarri dituzte; hamasei
dira denera lau multzotan banatuta eta multzo bakoitzean paperarena (urdina),
plastikoarena ( horia), organikoarena (marroia) eta errefuxa (beltza) daude.
Zer non bota informatzeko hormirudiak ere prestatu dituzte talde txikitan.
Konpostadora txiki bat ere eskuratu dute organikoaren deskonposizio prozesua
ikertzeko eta aldi berean konposta egiteko hamaiketakorako ekarritako jakien
ondakin organikoak baliatuz.
Horretaz aparte geletan erabilitako papera txikitu, uretan eduki eta
irabiatu ondoren birziklatutako papera lortu dute eta erabili artelanak sortzeko.